Trystan Lewis, B.A., M.Mus.

Arweinydd/Conductor

Mae Trystan yn adnabyddus fel unawdydd, arweinydd corawl a cherddorfaol a chymanfaoedd canu ac fel organydd a beirniad. Arweiniodd Gôr Aelwyd Pantycelyn am ddwy flynedd gan ennill dwy flynedd ar y tro gyda Chôr Cymysg a Meibion yr Aelwyd hwnnw.  Penodwyd ef yn arweinydd Côr Maelgwn naw mlynedd yn ôl ac o dan ei faton, maent wedi ennill Cystadleuaeth y Sealink, Y Genedlaethol ddwywaith (2005 a 2009) a buont yn rownd derfynol Cystadleuaeth y BBC. Bu’n organydd yn y Tabernacl, Aberystwyth tra’n fyfyriwr ac mae’n organydd ym Mheniel Deganwy ers ugain mlynedd ac yn canu’r organ yn achlysurol yn St John’s Llandudno Bethel, Deganwy. 

Mae wedi arwain bron i ddau gant o Gymanfaoedd Canu gan gynnwys Canada a Chymanfa Gogledd America yn ogystal â nifer o rai ar y teledu a’r radio. Mae galw arno fel unawdydd bâs-bariton, bu’n canu gyda Chymdeithas Gorawl Llanelli y llynedd ac eto eleni a bu’n canu fel unawdydd gwadd gyda nifer o gorau meibion ac yn unawdydd cyson yng nghyngherddau St John’s Llandudno.  Ef enillodd yr unawd Hen Ganiadau yn y Bala 2009. Mae’n feirniad cenedlaethol ac wedi beirniadu mewn bron i ddau gant o eisteddfodau.  Enillodd ei radd gyntaf B.A. yn Aberystwyth ac enillodd radd M.Mus. o Brifysgol Lerpwl mewn Astudiaeth Llais a Harmoni a Gwrthbwynt. 

Sefydlodd Gôr Cymysg Dyffryn Conwy ym 2005 i berfformio cyfanweithiau gyda cherddorfa a phenodwyd ef eleni yn arweinydd Cymdeithas Gorawl y Wyddgrug. 

Mae’n Diwtor Llais yng Nghanolfan William Mathias, Caernarfon ac ym Mhrifysgol Bangor yn ogystal â chadw Siop Lyfrau Lewis yn Llandudno, sef siop lyfrau ail-law a newydd yn ogystal â siop goffi.